Бид хамгийн хэрэгцээтэй бөгөөд хамгийн загварлаг ангилалд багтсан гутлуудыг онцолсон учраас та эдгээр загварын гутлуудаас сонголт хийх нь ухаалаг худалдан авалт болох болно.
Өдөр тутмын пүүз
Өдөр тутмын пүүз бол хүнд заавал байх ёстой гутал юм. Хөл гэдэг эрхтэнд багахан дэмжлэг үзүүлэх нь урт замыг туулах боломжийг олгоно. Хүний биеийн жингийн бүх ачаалал хөл дээр ирдэг учраас алхах үед гутал энэ ачааллыг бууруулдаг байх ёстой. Тав тухтай гутал нь биеийн тэнцвэрт байдалд нөлөөлж, биеийн жинг жигд хуваарилан, үе мөчний ачаалал, өвдөлтийг намдаадаг байна.
Маш олон загвар, өнгөний сонголтууд байдаг учир пүүзийг ямар ч хувцсан дээр зохицуулан өмсөх боломжтой. Алдартай, дээд зэрэглэлийн Prada-аас эхлээд 20 долларын үнэтэй пүүз хүртэлх ямар ч хүний төсөвт тохирсон бүх төрлийн хос загвар бий!
Цэргийн гутал
Цэргийн гутал бол хагас түрийт гутлууд дундаас өдөр тутамд өмсөхөд хамгийн тохиромжтой хувилбар юм. Ийм загварын гутлууд ямар ч хувцаслалт дээр зохицохоос гадна жилийн аль ч улиралд, хүйс хамаарахгүйгээр өмсөх боломжтойгоороо давуу талтай.
Бат бөх загвартай энэ гутлын үдээс, зузаан ул, өндөр түрий зэрэг нь бүгд цэргүүдийн хөлийг хамгаалах зориулалтаар хийгдэж байжээ. Одоо эдгээр гутлууд нь загварын тайзнаа болон өдөр тутмын хувцаслалтад ч ихээр өмсөгдөх болсон бөгөөд анхны хэв шинжээ одоог хүртэл хадгалсаар байна.
Балерина
Балерина урьд өмнөхөөсөө илүү дэгжин, тав тухтай болж хувцас загварт эргэн ирлээ! 18-р зууны эхэн үед балетчин Мари Камарго анх дэлгэрүүлж эхэлснээс хойш энэхүү сонгодог загварыг загвар зохион бүтээгчид дахин загварчилж, шинэчлэн сайжруулсаар ирсэн билээ. Энэ гутлууд загварын хувьд өхөөрдөм боловч хөлд тав тухгүй байдаг нь нууц биш юм. Хэрэв та 2000, 2010-аад оны загваруудаас өмсөж байсан бол энэ туршлагыг мэдэх нь дамжиггүй. Цэврүүтэх, хөл хөлөргөж, холгох зэрэг нь энэ гутлын хувьд байж болох зүйл мэт байжээ. Гэсэн хэдий ч эдгээр асуудлыг багасгах шинэ арга замууд бий.
Үүний нэг нь одоо балеринаг оймстой ч өмсөх боломжтой болсон. Балеринаг оймстой хослуулснаар загварлаг, эмэгтэйлэг дүр төрхийг бүрдүүлэх боломжтой. Харин оймстой өмсөх тохиромжгүй гэж үзвэл хөл хөлрөх асуудлыг хөлс дарагчаар шийдэж болно. Хамгийн гол нь балеринаг худалдан авахдаа уландаа зөөлөвчтэйг сонгоорой. Эсвэл зөөлөвч хийн өмсөж болох юм.
Усны гутал
Усны гутлууд нэгэн хэвийн, уйтгартай загвартай байсан үе ард хоцорч, бүх төрлийн хэлбэр хийц, өнгө, загварын сонголттой болжээ. Энэ төрлийн гутлууд бороотой, хүйтэн сэрүүн үед таны хөлийг дулаан, хуурай байлгах болно. Загварлаг, өнгөлөг усны гутлуудыг ямар ч төрлийн хувцастай зохицуулан өмсөж болох учир тав тухтай байхын зэрэгцээ дэгжин харагдаарай. Харин усны гутлыг сонгохдоо өмсдөг хэмжээнээсээ бага зэрэг том размерыг сонгохоо мартуузай!
Углааш
Торгон материалтай эсвэл сэвсгэр үсэн оруулгатай, өсгийтэй сандаал бол ямар ч хувцаслалтыг дэгжин бөгөөд харц булаам харагдуулах шидтэй. 2023 онд "хэт эмэгтэйлэг" энэ загварын углаашууд алдартай байх тул маш тав тухтай бөгөөд өмсөж тайлахад хялбар эдгээр гутлуудыг худалдан авахад харамсах зүйлгүй.
Хэрэв эмэгтэйлэг дүр төрх таны хэв маяг биш бол санаа зовох хэрэггүй! Ямар ч загварын сандаал сонгосон бай энэ нь танд ашиг тусаа өгөх болно. Хөл болон нумын мэргэжилтнүүд гэртээ углааш өмсөхийг зөвлөдөг. Учир нь хатуу шалан дээр хөл нүцгэн явах нь хөл болон өсгийд хэт ачаалал өгч, улмаар хөлийн нум сунаж, хавтгай болгодог байна. Өвлийн урт саруудад углааш нь таны хөлийг дэмжихийн зэрэгцээ дулаан, тав тухтай байлгах болно.
Уулын гутал
Хэрэв та ууланд алхах, явган аялал хийх сонирхолтой бол танд сайн чанарын уулын гутал зайлшгүй хэрэгтэй. Танд хэрэггүй гэж бодож байж болох ч, бат бөх чанартай энэ загварын гутлыг нэг авсан байхад ямар ч төрлийн гадаах арга хэмжээнд өмсөх боломжтой. Гэнэтийн нөхцөл байдалд ашиглах зорилгоор машиндаа хадгалж ч болох юм. Ямар төрлийн уулын гутал худалдаж авах нь таны явган аялал хийх газар, урьд өмнө ямар нэгэн гэмтэл бэртэл авч байсан эсэх, биеийн жин болон авч явах ачааны жин, хөлийн төрлөөс хамаарна. Авч явж буй ачааны даац их байх тусмаа шагайны дэмжлэг хэрэгтэй байдаг. Үүргэвчтэй аялагчдад шагайн хамгаалалттай гутал өмсөхийг зөвлөдөг бол энгийн өдрийн аялалд аялагчдад богино түрийтэй уулын гутал хэрэгтэй байдаг. Уулын гуталд өнгө тийм ч чухал биш. Харин та гадаад төрхдөө илүү анхаарал хандуулдаг төрлийн хүн бол гадуур хувцасныхаа өнгөтэй хослуулан авч болох юм.
Таавчиг
2022 онд хаа сайгүй харагдсан Crocs шиг загварын углаашууд нь спортын нийгэмлэгээс гаралтай. Эдгээрийг анх Adidas брэнд 1960-аад онд мэргэжлийн тамирчдад зориулан, өмсөж тайлахад хялбархан байхаар зохион бүтээж, дэлгэрүүлсэн тухай Лос Анжелес Таймс сонинд бичжээ. Түүнээс хойш энэ загварын углаашууд хувцас загварт хүч түрэн орж ирсэн билээ. Аялал зугаалга, усан санд, эсвэл гэртээ гээд ямар ч үед өмсөхөд тохиромжтой эдгээр шаахайнууд таныг загварлаг бөгөөд тав тухтай байлгах болно. Та маш олон брэндүүдийн санал болгож буй төрөл бүрийн өнгө, анхаарал татахуйц загварыг туршиж үзэх боломжтой.
Хагас түрийтэй гутал
Хагас түрийт гутал бол алдартнууд төдийгүй хувцас загварт дурлагч хэн бүхний хамгийн их таалдаг загвар юм. 2000-аад онд хувцас загварт хүч түрэн орж ирсэн эдгээр загварлаг гутлууд маш хурдацтай түгэн дэлгэрч, хувцасны шүүгээний салшгүй нэг хэсэг болсон. Одоо бид тэдэнгүйгээр амьдралыг төсөөлөхийн аргагүй билээ. Эдгээр гутал нь хамгийн энгийн харагдах төрхийг ч боловсронгуй, загварлаг хувцас болгон хувиргаж чадна. Цэргийн гуталтай адил хар өнгийн хагас түрийт гутал нь мом загварын жинсэн өмд, хослол эсвэл даашинзны алинтай нь ч төгс хосолно. Хагас түрийтэй гутал нь загвар, хийц зэргээс шалтгаалаад маш олон загварт хөрвөх боломжтой байдаг. Тэднийг загварчлах маш олон арга бий. Эдгээр гутлыг ажил дээрээ, болзоонд явахдаа, эсвэл тоглолт үзэхдээ гээд хаа сайгүй өмсөж болно. Тиймээс ч энэ төрлийн гутал хүн бүрийн хувцасны шүүгээнд зайлшгүй байх ёстой. Блокон өсгий эсвэл платформ ултай гээд төрөл бүрийн хэлбэр хийцтэйг та өөрийн хэв маягт тохируулан төвөггүй сонгох боломжтой.
Өсгийтэй гутал
Өсгийтэй гутал бол эмэгтэйлэг байдлыг тодотгож, бусдаас онцгойруулж чаддаг хамгийн сонгодог загварын гутал юм. Эсрэгээрээ энэ загварын гутал нь хамгийн тав тухгүйд тооцогддог нь ойлгомжтой. Мэдээжийн хэрэг та заавал өсгийтэй гутал өмсөх шаардлагагүй, гэхдээ олон бүсгүйчүүд үүнийг хааяа өмсөх дуртай байдаг. Хэрэв та шинэ өсгийт худалдан авах гэж байгаа бол зөөлөвчтэй эсвэл платформ ултай гутал хайж үзээрэй. 90-ээд оноос эргэн ирсэн платформ ул бол энэ жилийн трендийн нэг хэсэг юм. Ихэнх тохиолдолд өсгий нь тийм ч өндөр биш, зөвхөн платформ байдаг тул энэ загварын гутал нь илүү эвтэйхэн байдаг.
Өвдөг давсан түрийтэй гутал
Урт түрийтэй гутал бол намар, өвлийн турш хамгийн их өмсөгддөг загвар бөгөөд хагас түрийт гуталтай адил төрөл бүрийн хувцастай зохицуулан өмсөх боломжтой. Интернэт, дэлгүүрүүдээр хаа сайгүй байдаг энэ гутлыг сонгохдоо амьдарч байгаа газрынхаа цаг агаарт зохицуулан сонгохыг стилистүүд зөвлөж байна. Хэрэв та хүйтэн газар амьдардаг бол үстэй доторлогоотой гутал сонгоорой. Ямар ч хувцаслалтыг дэгжин харагдуулж чаддаг нь энэ загварын давуу тал юм. Өсгийтэй эсвэл намхан ултай гээд олон төрлийн сонголттой ба илгэн материалтай загвар нь нэмэлт аксессуар шаардлагагүйгээр таныг дэгжин, загварлаг харагдуулах болно.
Явган аяллын гутал
Тав тухтай явган аяллын гутал авахаа бүү мартаарай! Энэ гутлыг сонгохдоо хэт хүнд биш, тохирох материалаар хийгдсэн эсэхийг анхаарч үзэх хэрэгтэй. Мөн нум хэсэгтээ өндөрлөгөөтэй, уландаа зөөлөвч сайтай, хөдөлгөөн хийхэд саад болохооргүй, гутлын дотор талд зайтай байгаа эсэхийг харгалзан сонголтоо хийх нь чухал. Орчин үед явган аяллын гутлууд олон төрлийн хэлбэр, хийцтэй болсон төдийгүй хатуу резинэн материалаас илүү хөлийн тавхайг амрааж, хөлд ирэх ачааллыг бууруулдаг хөөсөн ултай загварууд ихээр гарах болсон. Өнгө, загварын сонголтыг танд үлдээе.
Шаахай
Гялалзсан ажил хэрэгч загвараас эхлээд гэрийн шаахай шиг энгийн хүртэлх маш өргөн сонголт бүхий энэ гутлыг өдөр тутамд, аялал зугаалгад гээд өмсөх боломжгүй газар гэж үгүй. Тэр дундаа энэ жилийн трендийн салшгүй нэг хэсэг бол яахын аргагүй эдгээр гутлууд байх болно. Сонгодог загварын хар өнгөтэй, арьсан шаахай таны хувцасны шүүгээнд байхад хэзээ ч илүүдэхгүй. Хэрэв та ийм загварын гутал хөлд эвтэйхэн эсэхэд эргэлзэж байгаа бол санаа зоволтгүй- энэ жагсаалтад багтсан хамгийн эвтэйхэн гутлуудын нэг юм. Өдөржин гадуур алхах, зогсоогоороо ажиллах үед ч хөлийг ядраахгүй, тав тухтай байдлыг алдагдуулахгүй байх болно.
Шүршүүрийн гутал
Фитнес заал эсвэл дотуур байрны гээд нийтийн угаалгын өрөөнд гуталгүй шүршүүрт орох нь хөлний мөөгөнцөр халдахаас эхлээд эрүүл мэндийн олон эрсдэлийг дагуулж байдаг. Энэ төрлийн халдварыг авсан тохиолдолд бүрэн эдгэртэл хэдэн 7 хоног шаардагдахаас гадна дахих магадлал өндөр байдаг. Эдгээр эрсдэлээс урьдчилан сэргийлж, шүршүүрийн гутлыг худалдан аваарай. Таны өөртөө хийх чухал хөрөнгө оруулалт байх болно. Зөвхөн угаалгын өрөөнөөс гадна далайн эрэг дээр ч өмсөхөд тохиромжтой. Флип флоп, таавчигтай харьцуулахад халтирч гулгахгүй, хөлд тав тухтай бөгөөд хөлийг гадны нөлөөллөөс хамгаалдаг онцлогтой.
Халтирдаггүй ултай гутал
Ажил мэргэжлийн онцлогоос шалтгаалан хүн бүрийн хэрэгцээ шаардлага өөр байдаг. Зочид буудал, кофе шоп, банк, дэлгүүр эсвэл гал тогоонд гээд амархан халтирдаг гөлгөр гантиг, бетонон шалтай газар ажилладаг хүнд халтирдаггүй ултай гутал зайлшгүй хэрэгцээтэй байдаг. Халтирдаггүй, барьцтай гутал нь үйлчилгээний ажил болон биеийн хүчний ажил, ер нь гулгамтгай шалан дээр явдаг хүн бүрт заавал байх ёстой. Гэхдээ зөвхөн ажил мэргэжлийн онцлог гэлтгүй та эдгээр гутлыг биеийн тамирын заал, цэцэрлэгт хүрээлэн, худалдааны төвд гээд ажлаас гадуур өдөр тутамдаа ч өмсөж болно.
Загварлаг сандаал
Зуны улирлыг загварлаг сандаалгүйгээр төсөөлөхийн аргагүй! Өдөр тутмын, энгийн загвараас илүү гоёмсог байдаг тул өдөр болон оройн арга хэмжээний алинд ч өмсөхөд тохиромжтой байдаг. Тэгвэл загварлаг сандаал гэж юуг хэлэх вэ? Энгийн флип-флоп эсвэл эрэгтэйлэг сандаалнаас бусад бараг бүх загварууд багтана. Энэ ангилалд гялгар, оосортой, арьсан, тэр ч байтугай өсгийтэй сандаалууд орно. Гладиаторын сандаал хувцас загварт буцаж ирсэн бөгөөд энэ төрлийн гутлын төгс жишээ юм. Арьсан оосортой, оломтой, зарим нь бүр гялалзсан чимэглэлээр бүрхэгдсэн байдаг. Гладиаторын сандаал танд тохирохгүй гэвэл платформ ултай эсвэл өсгийтэй сандаал таалагдаж магадгүй юм. Хар, цагаан, бор шаргал гэх мэт төвийг сахисан өнгө эсвэл тод ногоон өнгөтэйг сонгоорой.
Нийтлэлийг : https://www.thelist.com/1132470/types-of-shoes-every-woman-should-have-in-her-closet/
Comments